التاج دا في اصرار جامد عليه
اليكم اجابة التاج
نروجوا التركيز
أسم مدونتك؟
كلمات
لماذا أخترته ..وما هى نيتك من وراء أختياره؟
بصراحه معرفش ليه اخترت الاسم دا بس بعد كده حبيت الاسم دا
هل فكرت فى أغلاق مدونتك ؟ولماذا؟
انا من اول ما عملت البلوج دا مفكرتش اني اقفله او اتوقف عن التدوين لاني حبيت الجو دا جدا
بس حاليابفكر اني ادلت البلوج واختفي من عالم التدوين لاني اول ما دخلت التدوين
عرفت مدونات كتير بس في مجموعه كده ارتبط جدا بدونتهم وبعتبرها مدوناتي بحب كتابتهم جدا
ومبحسش اني نزلت بوست غير لما يعلقوا عليه
بس للاسف معظهم دلوقتي مش موجودين
ياريت يرجعوا لان التدوين ملوش معني من غيرهم
هما
كلام لوجيك
مش فاهم حاجه
وقطر الندي
عالمي ازرق
صورتك فى المدونه و رمزيتها؟؟
الصوره صورة مصطفي ابن اختي
بس طبعا اللي يشوف الصورة هيقول بنوته عسوله
لما دخلت عالم التدوين من الأساس؟
انا اول ما عرفت المدونات حبيت الموضوع جدا
وحسيت اني هلاقي مكان اتكلم فيه عن نفسي
بس انا اعترف في الذكري الشهريه الخامسه للمدونه
ان سبب دخولي التدوين لسه محققتوش
جمله قيلت لك فى وصف مدونتك؟
الجمله دي لسه متقلتش
التعليقات بالنسبه لك..واهميتها؟
التعليقات بالنسبه للموضوعات اللي بكتبها اكيد مهمه
اي فايده كلام اقوله من غير ما حد يقراه بحترم اي حد يسيب تعليق
بحب التعليق اللي بناقش في الموضوع وبيضيف ليه
انا بعلق علي الموضوع اللي افهمه ويعجبني
في موضوعات مبعرفش اعلق عليها لانها بتبقي جميله جدا
زي مدونه العزيزه جهينه
ا نا بحبها جدا وبحترم كل كلمه بتقولها وكل بوست بتنزله بقراه كتير اووي
بس معرفش اعلق علي موضوع عندها
أحلى بوست كتبته....ضع اللنك ثم أذكر لماذا؟
انا مقدرش اقيم نفسي وبعدين اصلا انا مش راضيه عن اي شئ عملته
أفضل بوست قرأته ؟وضع اللنك؟
افضل بوست قراته صعب اوي السؤال دا
اول بوست كاتبه الراقص مع الذئاب اسمه خلف التلال
أفضل مدونه قرأتها؟
السؤال دا بقي صعب جدا جدا
اي مدونه بسيب فيها تعليق وبزروها دايما تبقي من وجهه نظري مدونه كويسه
حد قل أدبه فى التعليق أيه رد فعلك؟
الحمد لله لسه محصلش ويارب ما يحصل رد فعلي لو دا حصل
خير ما نفعله في من لم يتق الله فينا
ان نتقي الله نحن فيه
ولا ايه
أسواء مدونه؟
اسوء مدونه بصراحه بقوا ياما
بس انا محبش اديهم اهميه واتكلم عنهم لانهم احقر من كده
أسواء بوست أسواء مدونه؟
لست ادري
هيحصل أيه لاميلك لما تموتى؟؟
اللهم اما ارزقني حسن الخاتمه
ساعتها بقي يولع الاميل مش مشكله
أديتى الباسوورد لحد قبل كده؟
مرة اديت الباسورد لشخص معين
وبعدها بخمس دقايق غيرتها
كانت أيه طبيعه علاقتك بيه؟
اخ عزيز ان شاء الله
:)
أسمك؟
بوسي الحديدي
المشهور بيه وسط أصحابك؟
واحده اسمها بوسي
هيقولهها ايه غير بوسي
عمرك؟
سنه 20
برجك؟
الجوزاء
وربنا ما يحكم علي حد بيه
اوعي تفكروا في يوم تعرفوا حد جوزائي
لانهم كلهم بالف حال في اللحظه الواحده
دراستك؟؟مجالك؟؟
انا بدرس صحافه
واكيد المجال برده صحافه بس بصراحه شغلة المنافقين
حتي لو قدرت متكونش منافق هتبقي مجبور انك تتعامل مع منافقين
ربنا يعفينا
شخصيتك نوعها ايه؟
شخصيه مليئة بالتناقضات
يعني ببقي متفائله جدا بس نظرتي للاشياء تشاؤميه
ببقي متضايقه جدا وحزينه وفي نفس الوقت بضحك قدام الناس
السفر بالنسبه لك؟
السفر بره مصر دا حلم حياتي السفر جوا مصر بحبه
بس بحب اسافر لوحدي
وقت فراغك بتعملى ايه؟
بعذب نفسي في وقت الفراغ
بفضل اكلم نفسي وتبدا المحاكمه
بلوم نفسي كتير ودا بتعبني جدا لان اللوم مبيغيرش شئ بس بتعلم منه
علشان كده مبحبش وقت الفراغ اصل بوسي بتبقي صعبه اوي
المود بتاعك؟
انا دايما الحمد لله مبتسمه وشكلي يدعوا الي الفرح دا من نعمه ربنا عليا
لكن ساعات بقفل قفله مهببه ربنا ما يوريكم ببقي في الوقت دا غبيه
الأكله المفضله؟
المحشي علشان دا الاكله الوحيده اللي بعرف اعملها
والمكرونه علشان ماما مش بترضي تعملها
الصفات التى أخذتها من بابا؟
بابا ربنا يخليه ليا ياريت ابقي زي بابا انا اخدت منه الطيبه
بابا علمني اني اصدق الناس واثق فيهم
نفسي اقوله دلوقتي شفت اخدت ايه من الناس اللي بصدقهم وبثق فيهم
الصفات التى أخذتها من ماما؟
ست الكل العصبيه العصبيه ثم العصبيه
أكتر ست حاجات بكرهها؟
كنت الاول بقول ان الانسان مش لازم يكره
الكره دا مش من صفات البشر بس الحمد لله البشر علموني اكره
واول شئ كرهته الكذب لان بالكذب كل الحقايق بتتبدل وحتي الناس بتتبدل بالكذب
النفاق بجد صعب اوي اما تحس ان اللي حواليك بينفقوك
الظلم اوحش احساس في الدنيا الظلم
الكره الكره دا وحش جدا
انا بكره البشر اللي علموني الكره
أكتر ست حاجات بحبها؟
البطاطس
وشربات توتو
ولعب الاطفال
وصوت عبد الوهاب
الهدوء مع اني مزعجه جدا
وكحلوشه لما يجي يصحيني
الشغل بالنسبه لك؟
بالنسبه للصحافه
شغل التحقيقات متعه متعبه
اما بقي الاخراج فدا المزاج والراحه
الأنترنت بالنسبه لك؟
حاجه مهمه بس مش اساسيه
حتي الانترنت كرهته
أمرره لمين؟؟
ياساتر يارب
الناس كلها اخدت التاج دا اصلا
اخير انا متاسفه علي الاطاله
هناك ٣٣ تعليقًا:
اجاباتك جميلة يا بوسى
أجاباتك جميله
تحياتي ليك
التاج علينا حق
معلش
بس بجد اجاباتك حلوه اوي
بتعرفي بدبلوماسيه انك تزوغي من الاجابات الصعبه
تحياتي
ناعم ياختى
تأفلى أيه
ومبتحسيش أنك كتبتى الا لما الصف ألى رستيه ده يعلق امال أحنا بقه أراطيس جوافه
طيب انا أعمل أيه بعدك يا بوسى ما أنا وقعه فى نفس المشكله أنا برده مبحسش أنى كتبت حاجه ألا لما تيجى وتعلقيلى
ألزم مكانك المكان محاصر
أما بقيه الاجابات زى السكر زيك يا جميل
هههههههههه
علي فكره انا مررتلك التاج ده
ههههههه
بس بجد اجاباتك واقعيه وجميله اوي
تحياتي ليكي
يادي الاحراج يا بوسي
يا بنتي انا ترجت جدا من كلامك عليا
تسلميلي ياقمر
كلك والله انسانه ذوق وحساسه
وبجد كل البوستات الي عجبتك عندي اهداء خاص ليكي انتي يا بوسي
اجباتك حلوه يا قمر
وصوره ابن اختك عسل
ربنا يخليهولكوم
وعقبالك يا جميله
تسلميلي يا بوسي والله
تحياتي يا قمر
عبد الرحمن
الله يخليك
متشكره علي
مرورك
wahed
اهلا بيك
طبعا انت مسافر تصيف
يارب تقضي وقت كويس
وترجع بالسلامه ان شاء الله
ومستنين بوستات جديده ليك
اسكندراني اووووي
التاج علينا حق
خصوصا لو كان جاي من حد جميل زي كلمات وفي القلب
وبعدين انت متهرب من التاجات
صح بسمع ان عليك تاجات ياما
منورانا
في القلب
العزيزه اوشا
والله تعليقك عندي شرف ليا
انا بجد بفرح بكل حد بيدخل ويعلق عندي
بس انت لو دخلتي مدونتهم اكيد هتحسي بكابه لانهم مش موجودين
انا كل اللي بتمناه انهم يكونوا بخير
ويرجعوا يطمنونا عليهم
اما انت فبجد اخت ليا
وانا لو سبت التدوين هتابع المدونات كاني موجوده
ربنا يخليك يا قمر
منورانا
شاب نفسه يحقق حلمه
تخيل انا كل ما اقرا اسم مدونتك
ادعيلك تحقق حلمك
متشكره جدا علي تمرير التاج
ويارب تحقق حلمك
نورتنا
جهينه
ازيك يا جيجي
شرف ليا انك تهدي البوستات ليا
بجد ربنا يخليك ويكرمك يارب
والله وجودك في المدونه بيسعدني
سلام يا جيجي
بوسى
اجابتك جميله
وانشاء الله يكون لك مستقبل
باهر فى الصحافه
تحياتى وسلامى
ههههههههههههههههه , اجاباتك حلوة اوى , ويارب صحابك بتوع المدونات اللى مشيوا دول يرجعوا تانى يااااااااارب , وماتقوليش على الايميل يولع ( وش متنرفز) , مش جايز يبقى ذكرى ليهم من بعدك , بعد عمر طويل إن شاء الله ؟؟, ويدخلوا ويكلموا صحابك علشان يفتكروكى (وش محول)
بوسى اجاباتك حلوة اوى
تحياتى
بوسى اجاباتك حلوة اوى
تحياتى
أنا مررت ليكى تاج حملة أنترنت بلا حدود ياريت تشوفيه وتاخديه
كل تاج وانتى طيبة
على فكرة البروفايل بتاعك جاب رقم مميز
وانا داخلة 1111
شفتى حظى حلو ازاى
سلامى
اجابات جميلة ورائعة
تحياتي
كلمات
ربنا يخليك
مستقبل يكسر الدنيا اكيد طبعا
ربنا يكرمك
نورتيني
ومتشكره جدا علي التاج
زي الهوا
يارب كلهم يرجعوا لعالم التدوين
اصحابي اما اموت هيعرفوا اني مت
يمبقي ليه يفضل الاميل موجود يفكرهم بيا
في الوقت دا يولع
وش مكسوف
شمعه امل
ربنا يخليك
دا بس من زوقك نورتيني
*********
بوسبوس
بصراحه التاج الجديد خنيق اووي
احتمال تسعين في الميه مجاوبش عليه
اصله خنيق ومش فاهمه
ربنا يسهل
ومتحرمش منك يا قمر ولا من تاجاتك
اميرة ويلز
شفتي ازاي انا سيبالك رقم مميز
اول ما تيجي تلاقيه
انا اتشرفت بزيارتك ليا
وياريت تتكرر
متخافيش في ارقام مميزه ياما
بس تعالي انت بس
صاحب البوابة
اشكرك علي مرورك
انا رحت عندك لاقيت نفس التاج
يلا خير
كل تاج وانت بخير
تحياتي
كويس واهي ملامح نعرفها عنك برضو
أنا هتناول الموضوع حبة حبة على حسب اللي يشد
أنا من رأيي أن الآراء المهمة مش لوحدها بتعمل الجو و مؤكد في آراء مهمة ولسه ما انتبهنالهاش ف اياكي تقفلي المدونة
الا مصطفى ده المدونة كوم ومصطفى لما أشوفه عندي في التعليقات ده كوم تاني
على تقلب المزاج يا جوزاء في ناس بتكره المزاج الواحد و نفسها تغير وعلى فكره الجوزاء في ناس بتقول عليه الجبار ياماما
السفر ممتع بس تسافري لوحدك أيا كان مش أمان أنصحك تاخدي معاكي صحبة طيبة
ربنا يباركلك في بابا و ماما و العصبية مش وحشه على طول برضو و في ناس لما بيتعصبوا بيبقوا أحلى
ههههههههههههههههههه
وكحلوشه لما يجي يصحيني
نعم؟؟
يعنى ايه كحلوشه
كل تاج وانتي طيبه
بوسى :) فينك ؟
أنتى من برج عبد الحليم
كنتى فين يا بنتى؟
على فكرة كلام لوجيك رجع تانى حتلاقى موضوع جديد فى صندزق الدنيا و أنا عرفت من وينكى أنه فى الكويت
ما طوليش الغيبة تانى كده أنتى الى زيك قليلين
مين قال عليا تاجات اللي عنده تاج يوريهولي كده
ههههههههههههههه
داانا جالي تلات تاجات في اقل من اسبوعيييييييييين
تحياتي
بتاع الفنكوش
اولا بشكرك علي تناولك للتاج واجاباته بالتفصيل
وياريت الملامح اللي وصلت ليه تكون كويسه مش وحشه
نبتدي من الاخر
كحلوشه دا عبدالرحمن ابن اختي
العصبيه شئ كويس في بعض الاحيان
في امور تستاهل انك تتعصب
اما برج الجوزاء ياساتر يارب علي برج الجوزاء ومواليده
نورتني
ونجيلك في تاج ان شاء الله
عاليا حليم
تعرفي كنت متاكده انك هتقولي اني من نفس برج عبد الحليم
كلام لوجيك رجع في صمت
ربنا يستر وميغبش تاني
انا علي فكره كنت منزله بوست مؤسوي شويه
وفي ناس علقت عليه بس مسحته
منورانا يا عاليا
اسكندراني
اهلا بيك
انا كتبت التعليق دا
ولقيتك منزل بوست بالتاجات
يلا حصل خير
ربنا ما يحكم عليك بتاج
وانت كده اصلا ضربت رقم قياسي في التاجات
منورنا
اختى العزيزة بوسى
ازيك؟ يارب تكونى فى اتم صحة وافضل حال
بقالى كتير منقطع عن زيارتك بس غصب عنى والله
تاجك هايل جدا واستمتعت بقراءته جدا
شخصيه مليئة بالتناقضات
عاوز أقولك جملتك التالية بتنطبق عليا تماما
يعني ببقي متفائله جدا بس نظرتي للاشياء تشاؤميه
ببقي متضايقه جدا وحزينه وفي نفس الوقت بضحك قدام الناس
وبخصوص السفر ..استغربت انك بتحبى تسافري لوحدك
متعة السفر فى الصحبة الحلوة واللمة ومشاركة اللحظات الجميلة مع الآخرين
انا من هواة السفر جدا جدا
فى نهاية تعليقى أحب اشكرك كتير على كلامك الجميل الذي أعتز به كثيرا ويشرفنى ان اكون من المعلقين الذين تسعدين بتعليقاتهم لديكى
خالص مودتى
دمتى فى حفظ الله
كلام لوجيك
منور المدونه
ايه الغيبه دي كلها
وانا كده حسيت اني نزلت بوست بتعليقك دا
حمدلله علي السلامه وربنا يعينك في شغلك ويوفقك
ومتغبش تاني
انا بحب اسافر لوحدي مبحبش حتي السفر مع اهلي
مزاج عندي اني اسافر لوحدي
متشكره جدا علي مرورك هنا
وياريت نشوفك دايما
تاج جميل وقدر يعبر عنك بصدق واجاباتك كانت مدهشه بس مشكله التاج انه ما عرفش يعصبك بما انك بتقولى انك عصبيه ولما تعملى محشى ابقى اعملى حسابى اصله ليه معزه خاصه عندى
إرسال تعليق