٢٥ نوفمبر ٢٠٠٧

تــــنـــاقـــــض

أحسن إلي الناس تستعبد قلوبهم فطالما استعبد الاحسان اناسا

**
قيل لفيثاغورس : من الذي يسلم من معادة الناس ؟
قال : من لم يظهر فيه خير ولا شر
قيل : وكيف
قال : لانه إن ظهر منه خير عاداه الاشرار

وان ظهر منه شر عاده الاخيار
*******

إذا كان الامس قد ضاع

فبين يديك اليوم

وإذا كان اليوم سوف يجمع اوراقه ويرحل
فبين يديك الغد

فلا تحزن علي الامس فهو لن يعود

ولا تأسف علي اليوم فهو راحل
**
كيف يفرح بالدنيا من يومه يهدم شهره

وشهره يهدم سنته
وسنته تهدم عمره
****

٢٢ أكتوبر ٢٠٠٧

أدركــــت الأن ......

أدركت الان

ان الانسان إذا لم يصنع لنفسه السعاده فلن يجدها


أدركت الان

أن الطعنات لا تأتي إلا من الإصدقاء


أدركت الأن

أن الخوف شبح إذا ما أمنا بوجوده تحكم فينا


أدركت الأن

ان الحياة أمل وإذا ضاع الأمل فلن تجد الحياة

أدركت الأن

ان مساحة الصفاء والخير بداخلنا أقل بكثير من النفاق الذي يدور الناس في فلكه


أدركت الأن

اننا بشر

١٠ سبتمبر ٢٠٠٧

رمـــضـــــان كــريــم




كل سنه وكلكم طيبين

ورمضان كريم
انا مش هتكلم عن افضال رمضان ولا الاستعداد للشهر الكريم لان في مدونين ربنا يكرمهم اتكلموا في النقط دي باستفاضه وجزاهم الله كل خير

طبعا رمضان بالنسبه ليا مش هيبدا ولا هحس بيه غير لما اسمع صوت المسحراتي
فعلا رمضان دا كنز ياريت كلنا نقدر نستغله
وياريت كلكم تدعولي في رمضان اوعوا تنسوا تدعولي والدعاء يكون بضمير
يارب كلنا نقدر نستغل الشهر دا كويس

لان بسرعه بيعدي

وفجاه تلاقي المسحراتي ماشي يقول

الوداع الوداع يا شهر الصيام

وتلاقي التليفزيون بيقول

تم البدر بدري والايام بتجري

علي فكره انا جالي فانوس من زمان مش جالي فانوس

كل سنه وانتم طيبين

ورمضان كريم

نتفق بقي
من قبل ما الشهر يبدا انا بفكركم بالعيديه بتاعتي

يعني تبدقوا تحوشوا من دلوقتي قدمكم وقت اهوه ومفيش اعزار
بعد رمضان هاجي اخد العيديه

٢٨ أغسطس ٢٠٠٧

رؤيـــــة

عجبا لواقعنا الذي نعيشه
عجبا لانفسنا
لاسلوب حياتنا لمعتقداتنا
عــجــبــا

إذا نظرنا إلي واقعنا الذي نعيشه ،نجد أننا نعيش واقع لا يحتمل نعيش حياة مليئة بكل ما هو سئ ،بكل ما يضر ولا ينفع ،مليئة بالغش والنفاق ،مليئة بالزيف والخداع ،حياة ملونة ولكنها ملونه بلون كئيب

وفي الوقت الذي يعرف كلا منا هذا الواقع وهذه الحقائق المؤلمة التي تملآ حياتنا تجدنا نهرب من هذا الواقع نهرب بالضحك احياننا وكأننا نمثل دورا لشخص فاقد الوعي
ولا نحاول مواجهه هذا الواقع وسلبياته نكتفي فقط بالهروب منه
أما اذا نظرنا لانفسنا ،نجد اننا اشخاصا غريبة ، فنحن نترك كل ما هو جميل بداخلنا من الطبيعة والفطرة والطيبة والحق والخير والوضوح وحب العمل نبتعد عن كل الملامح الجميلة في انفسنا نتركها وننمي بداخلنا جانب الشر وملامحه ، ننمي حب الذات والانانية والحقد والكسل والانانية والتواكل

لماذا نحن كذلك
فقدنا الخير وعثرنا علي الشر...... كرهنا العمل وفضلنا الكسل

أما اذا نظرنا الي اسلوب تفكيرنا نجد ما هو اشبه بالمضحكات المبكيات

اما انهم من اصحاب التجارب القاسية المؤلمة الذين يعيشون قسوه هذه التجربة والامها طيله حياتهم
تفكيرنا دائما ما ينحصر في ان من ليس معنا هو ضدنا وان الاختلاف يعني العداوه


اما اذا نظرنا لمعتقداتنا فنجد اننا في سبيل الهروب من هذا الواقع المؤلم نعتقد اعتقدات معينه ونؤمن بصدقها


نؤمن بنظرية المؤامرة وان كل ما يحدث لنا هو من تدبير الاخرين والذين يريدوا ان ينالوا منا
ولكن مجرد الايمان بالمؤامره هو حقا المؤامرة
ان ما يحدث لنا انما هو من ضعفنا وتخاذلنا وسكوتنا علي الحق وحالة اللامبالاه التي نعيشها
لعل الحل هو ان نؤمن بهذا الواقع ونقدر حجمه الطبيعي
ومن بعد ذلك نفكر في ما سوف نفعله
؟

٢٣ أغسطس ٢٠٠٧

مــــركـــز أووووول






القاهره اكثر عواصم العالم تلوثا

طبعا التلوث مش جديد بس مركز اول دا الجديد
انا اما قرات مقاله من حوالي سنه وكان الكاتب بيصف القاهره بعاصمه القزاره كرهت الشخص دا


وقلت ازاي يقول كده مستحيل نكون كده
بس خلاص بقينا مركز اول بجداره
اعتقد كده إن العمر الافتراضي للمصريين انتهي ، يعني لو المياه اما بتسسم واما مش موجوده والقمح المسرطن وان كان عجبكم ، والمبيدات والتامين الصحي ومافيا المستشفيات الحكوميه وغيره وغيره
بس المشكله اننا سبب المشكله دي
والمفروض جزء من حل المشكله دي متوقف علينا
ممكن نقول ان الحكومه عملت اللي عليها وزياده اما اتعاقدت مع الشركه الاسبانيه علشان تحل مشكله القمامه في القاهره والجيزه مقابل 160 مليون جنيه في السنه
وطبعا لضعف التمويل وعدم وجود مزانيه الشركه مشت قبل ما تحل المشكله في ميزه واحده انها خلقت مشكله كمان اننا طلعنا مديونين للشركه ب 300 مليون جنيه
طبعا الاهمال هو اللي وصلنا لكده وهيوصلنا للي اكبر من كده
ليه منحترمش ادميتنا كبشر ونحافظ علي بلدنا انا طبعا معرفش المسابقه اللي اتعملت دي اتعملت علي اساس ايه بس يكفي اننا بقينا كده واما نفضل كده بل اسوء واما نحاول نكون احسن
اكيد مش معضله اننا نحل مشكله زي دي

بس تفتكروا ممكن تتحل ازاي

؟؟؟؟؟

١١ أغسطس ٢٠٠٧

موج البحر






الدنيا زي موج البحر واحنا كمان زي موج البحر

لما تبص علي موجه

تلاقيها جايه من بعيد فيها قوه ونشاط وفي الاخر

اول متقرب للشط بتهدي وتحس انها بترجع وتحس انها بتختفي وتيجي موجه تانيه تقويها وتشدها لقدام

ممكن موجه تتصدم بموجه


وممكن موجه وموجه يبقوا موجه واحده بس موجه قويه


بس البحر كله مينفعش يبقي موجه واحده

اوقات بيبقي موج البحر شديد


واوقات بيبقي هادي


بس دا ميمنعش اننا في كل وقت بنحب البحر


بالظبط احنا كده صعب نتفق علي شئ واحد لان مفيش شئ كامل وصفه الكمال مش موجوده غير في الله عزوجل

ممكن نختلف نعادي بعض ولو اتفقنا اكيد هنكون اقوي

الانسان مينفعش يعيش لوحده مهما ان حس ان الدنيا ضده والناس ضده

لازم نتعلم نواجه نواجه نفسنا بحقيقتنا

ونواجه الناس بالحقيقه دي


٠٦ أغسطس ٢٠٠٧

تاااااج وتاج



موسم التاجات
في ثلاثه من التيجان باقين تاجين من بوسبوس وتاج من شمس
هندمج تاج شمس مع تاج من بوسبوس ونلغي التاج التالت

يلا بقي استحملوا التاجات

اليكم التاج
احب شخص لقلبك في الدنيا؟
بابا ربنا يخليه ليا

انسان مستعد تضحي يحياتك عشانه ؟
مفيش حد ممكن اضحي بحياتي علشانها فكره التضحيه اصلا ملغيه من قاموسي مفيش حد مهما كانت اهميته يستحق اني اضحي بحياتي علشانه باستثناء بابا طبعا

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك ؟
احلي حاجه في السؤال دا كلمة تنقض عليه
انا الفكرة دي كانت بتيجي علي بالي وانا صغير
أي حد يضايقني اتخيل لو قتلته اكيد حياتي هتبقي احسن
بس دلوقتي في ناس تستاهل اكتر من القتل ولو بايدي كنت قتلتهم

اهم جهاز منزلى انت متعلق بيه او بتستخدمه كتير؟
جهاز منزلي يبقي الخلاط
بجد انا بحب الخلاط جدا
شىء تحس بالراحة النفسية عندما تنظر اليه؟
انا أي شئ مش مفهوم بجد براتاح لما ابصله
يعني صورة مش مفهومه رسمه عجيبه ارتاح جدا اما افضل بصه لي
في حاجه كمان الاطفال وهما نايمين ببقوا زي الملايكه برتاح جدا لما اصحيهم

مكان تحس فيه بالحنين الى شىء لا تدرى ماهو و ذكريات جارفة الى لاشىء؟
بيتنا
بيتنا وانا فيه ببقي مفتقده حاجات كتيره جدا في
الحاجات دي موجوده بس للاسف ضاع احساسنا بيها

اجمل مدينة زرتها داخل مصر؟
طبعا اسكندريه مكان يتمتع بالجمال
بس جمال المكان بناسه وزكرياته وعلشان كده بلدي احلي بلد في الدنيا
أجمل مكان طبيعي رأيته داخل مصر؟
انظر الشكل في اول البوست

شخصية كارتونية بتحبها؟

نودي وباباربمووت فيهم وبكار طبعا علشان المنتج المصري


أهم هدف انت واضعه لحياتك دلوقتى؟
اني اكون اقوي من الظروف اللي اتحطيت فيها واعدي من الازمه دي واكون اقوي منها
في هدف تاني بس ادعولي اقدر احققه
مواصفات فتاة/ فتى الأحلام بالنسبة لك ؟
طبعا بعيد عن الموصفات هو اصلا لازم اكيد حد بيعرف ربنا علي خلق بار باهاله
بس

لون البطانية اللى بتتغطى بيها فى الشتاء؟
شتاء يااااااا والله اكتر شئ بحبه البرد والشتاء
بس انا بتغطي بكتير اووي بس احلي لون بطانيه فيهم البني في بيج

احساس يراودك فى اشارة مرور مغلقة بسبب مسئول كبير؟
الحمد لله ان معندناش اشارة مرور ولا مسئول

مين أكتر 6 أشخاص بتحبهم ؟
اكتر ست اشخاص
بالنسبة للاسرة بيقي
بابا وماما ونقين ونسرين وسحر ودعاء وايه
بالنسبة للاطفال يبقي مصطفي وعبدالرحمن واسراء وميرنا وريم و رحيل

بالنسبة للاصحاب يبقي سلوي ومايسة ولاء وهبه وبسمه وبسمه

هل أنت سعيد (وفي حالتي دي هل أنتي سعيدة) ؟
السعاده والحزن اشياء مش دائمه
بس السعاده في الرضا

لو اجتمعت مع حسني مبارك في مكان واحد هتقول له ايه ؟
خلينا نتكلم بصراحه هيحصل ايه لو اتكلمنا بصراحه
انا هعمل معاه حوار صحفي وانفرد بقي بتصريحات تاريخيه انتم عارفين طبعا

إيه أكتر موقف محرج ؟
مثلا لو بتبعت ماستج لحد وتروح لحد تاني

المشكله مش بتبقي في الموقف المشكلة في ازاي تواجهه
الحمد لله ربنا بيسترها معانا

الأمنية اللي تتمنى تحقيقها؟
اتمني ان ربنا يكتبلي حسن الخاتمه
اتمني اني انجح علشان النتيجه قربت تظهراتمني ان ربنا يوفقني

طبعا بقيت الاسئلة ملغيه دا شئ متفق عليه

في سؤال عايزه اساله

واكيد لازم هتجوبوا

احساسك بيبقي عامل ازاي لما حد يكذب عليك وانت عارف انه بيكذب
اخيرا
تم بحمد الله

************

انا همرر التاج دا لاختي وصدقتي العزيزه مؤمنه

وقلب ابيض

وياريت تجاوبوا بسرعه

واي حد عنده تاج ليا

المدونه ترحب بكل التاجات

٠٣ أغسطس ٢٠٠٧

تاااااااااااااااااج

التاج دا في اصرار جامد عليه

الجميله كلمات والجميلة مكان في القب مرروه ليا

اليكم اجابة التاج

نروجوا التركيز

أسم مدونتك؟

كلمات

لماذا أخترته ..وما هى نيتك من وراء أختياره؟

بصراحه معرفش ليه اخترت الاسم دا بس بعد كده حبيت الاسم دا

هل فكرت فى أغلاق مدونتك ؟ولماذا؟

انا من اول ما عملت البلوج دا مفكرتش اني اقفله او اتوقف عن التدوين لاني حبيت الجو دا جدا

بس حاليابفكر اني ادلت البلوج واختفي من عالم التدوين لاني اول ما دخلت التدوين
عرفت مدونات كتير بس في مجموعه كده ارتبط جدا بدونتهم وبعتبرها مدوناتي بحب كتابتهم جدا

ومبحسش اني نزلت بوست غير لما يعلقوا عليه
بس للاسف معظهم دلوقتي مش موجودين

ياريت يرجعوا لان التدوين ملوش معني من غيرهم

هما

كلام لوجيك

مش فاهم حاجه

وقطر الندي

عالمي ازرق

صورتك فى المدونه و رمزيتها؟؟

الصوره صورة مصطفي ابن اختي

بس طبعا اللي يشوف الصورة هيقول بنوته عسوله

لما دخلت عالم التدوين من الأساس؟

انا اول ما عرفت المدونات حبيت الموضوع جدا

وحسيت اني هلاقي مكان اتكلم فيه عن نفسي
بس انا اعترف في الذكري الشهريه الخامسه للمدونه

ان سبب دخولي التدوين لسه محققتوش

جمله قيلت لك فى وصف مدونتك؟

الجمله دي لسه متقلتش

التعليقات بالنسبه لك..واهميتها؟

التعليقات بالنسبه للموضوعات اللي بكتبها اكيد مهمه

اي فايده كلام اقوله من غير ما حد يقراه بحترم اي حد يسيب تعليق

بحب التعليق اللي بناقش في الموضوع وبيضيف ليه

انا بعلق علي الموضوع اللي افهمه ويعجبني

في موضوعات مبعرفش اعلق عليها لانها بتبقي جميله جدا

زي مدونه العزيزه جهينه
ا نا بحبها جدا وبحترم كل كلمه بتقولها وكل بوست بتنزله بقراه كتير اووي

بس معرفش اعلق علي موضوع عندها

أحلى بوست كتبته....ضع اللنك ثم أذكر لماذا؟

انا مقدرش اقيم نفسي وبعدين اصلا انا مش راضيه عن اي شئ عملته
أفضل بوست قرأته ؟وضع اللنك؟

افضل بوست قراته صعب اوي السؤال دا

في بوست لجهينه اسمه انا والصلصال دا بجد تحفه قراته حوالي تسعين مره

في بوست اسمه تناقض لمش فاهم دا بوست كلماته قليله بس فظيع

اول بوست كاتبه الراقص مع الذئاب اسمه خلف التلال

أفضل مدونه قرأتها؟

السؤال دا بقي صعب جدا جدا

اي مدونه بسيب فيها تعليق وبزروها دايما تبقي من وجهه نظري مدونه كويسه

حد قل أدبه فى التعليق أيه رد فعلك؟

الحمد لله لسه محصلش ويارب ما يحصل رد فعلي لو دا حصل

خير ما نفعله في من لم يتق الله فينا

ان نتقي الله نحن فيه

ولا ايه

أسواء مدونه؟

اسوء مدونه بصراحه بقوا ياما

بس انا محبش اديهم اهميه واتكلم عنهم لانهم احقر من كده

أسواء بوست أسواء مدونه؟

لست ادري

هيحصل أيه لاميلك لما تموتى؟؟

اللهم اما ارزقني حسن الخاتمه

ساعتها بقي يولع الاميل مش مشكله

أديتى الباسوورد لحد قبل كده؟

مرة اديت الباسورد لشخص معين

وبعدها بخمس دقايق غيرتها

كانت أيه طبيعه علاقتك بيه؟

اخ عزيز ان شاء الله

:)

أسمك؟

بوسي الحديدي

المشهور بيه وسط أصحابك؟

واحده اسمها بوسي

هيقولهها ايه غير بوسي

عمرك؟

سنه 20

برجك؟

الجوزاء

وربنا ما يحكم علي حد بيه

اوعي تفكروا في يوم تعرفوا حد جوزائي

لانهم كلهم بالف حال في اللحظه الواحده

دراستك؟؟مجالك؟؟

انا بدرس صحافه

واكيد المجال برده صحافه بس بصراحه شغلة المنافقين

حتي لو قدرت متكونش منافق هتبقي مجبور انك تتعامل مع منافقين

ربنا يعفينا

شخصيتك نوعها ايه؟

شخصيه مليئة بالتناقضات

يعني ببقي متفائله جدا بس نظرتي للاشياء تشاؤميه

ببقي متضايقه جدا وحزينه وفي نفس الوقت بضحك قدام الناس

السفر بالنسبه لك؟

السفر بره مصر دا حلم حياتي السفر جوا مصر بحبه

بس بحب اسافر لوحدي

وقت فراغك بتعملى ايه؟

بعذب نفسي في وقت الفراغ

بفضل اكلم نفسي وتبدا المحاكمه

بلوم نفسي كتير ودا بتعبني جدا لان اللوم مبيغيرش شئ بس بتعلم منه

علشان كده مبحبش وقت الفراغ اصل بوسي بتبقي صعبه اوي

المود بتاعك؟

انا دايما الحمد لله مبتسمه وشكلي يدعوا الي الفرح دا من نعمه ربنا عليا

لكن ساعات بقفل قفله مهببه ربنا ما يوريكم ببقي في الوقت دا غبيه

الأكله المفضله؟

المحشي علشان دا الاكله الوحيده اللي بعرف اعملها

والمكرونه علشان ماما مش بترضي تعملها

الصفات التى أخذتها من بابا؟

بابا ربنا يخليه ليا ياريت ابقي زي بابا انا اخدت منه الطيبه

بابا علمني اني اصدق الناس واثق فيهم

نفسي اقوله دلوقتي شفت اخدت ايه من الناس اللي بصدقهم وبثق فيهم

الصفات التى أخذتها من ماما؟

ست الكل العصبيه العصبيه ثم العصبيه

أكتر ست حاجات بكرهها؟

كنت الاول بقول ان الانسان مش لازم يكره

الكره دا مش من صفات البشر بس الحمد لله البشر علموني اكره

واول شئ كرهته الكذب لان بالكذب كل الحقايق بتتبدل وحتي الناس بتتبدل بالكذب

النفاق بجد صعب اوي اما تحس ان اللي حواليك بينفقوك

الظلم اوحش احساس في الدنيا الظلم
الكره الكره دا وحش جدا
انا بكره البشر اللي علموني الكره

أكتر ست حاجات بحبها؟

البطاطس

وشربات توتو

ولعب الاطفال

وصوت عبد الوهاب

الهدوء مع اني مزعجه جدا

وكحلوشه لما يجي يصحيني

الشغل بالنسبه لك؟

بالنسبه للصحافه

شغل التحقيقات متعه متعبه

اما بقي الاخراج فدا المزاج والراحه

الأنترنت بالنسبه لك؟

حاجه مهمه بس مش اساسيه

حتي الانترنت كرهته

أمرره لمين؟؟

ياساتر يارب

الناس كلها اخدت التاج دا اصلا

اخير انا متاسفه علي الاطاله

١٣ يوليو ٢٠٠٧

لحظات لا تنسي




لحظــات لاتنســى

لحظات الحب ... هي اللحظات التي تخلد في أذهاننا وتحمل كل معاني

السعادة ... فلا تندم على لحظة حب عشتها حتى ولو صارت ذكرى تؤلمك

فإذا كانت الزهرة قد جفت وضاع عبيرها ولم يبقى منها غيرالاشواك

فلا تنسى انها منحتك يوماً عطراً جميلاً أسعدك ...

لا تكسر أبداً كل الجسور مع من تحب ، فربما شاءت الاقدار

لكما يوماً للقاء آخر يعيد ما مضى ويوصل

ما انقطع فإذا كان العمر الجميل قد رحل ..فمن يدري

فربما ينتظرك عمر أجمل ...

وإذا قررت أن تترك حبيباً أو صديقاً فلا تترك له جرحاً

فمن أعطانا قلباً لا يستحق منا أن نغرس فيه

سهماً أو نترك له لحظة تشقيه ...

ما أجمل أن تبقى في روحكما دائماً لحظات الزمن الجميل

فإن فرقت بينكما الايام ... فلا تتذكر لمن تحب

غير كل احساس صادق ولا تتحدث عنه إلا بكل ما هو رائع

ونبيل ، فقد أعطاك قلباً وأعطيته عمراً ...

وإذا جلست يوماً وحيداً فحاول أن تجمع حولك ظلال الأيام الجميلة

التي عشتها مع من تحب ...

واترك بعيداً كل مشاعر الألم والوحشة التي

فرقت بينكما فالأفضل أن يحاول المرء أن يقف بذاكرته عند

أجمل لحظة لقاء عاشها ، لأنها أروع بكثير من لحظة وداع وافتراق ...

فــحـاول أن تجمع دفاتر وأوراق كل الكلمات اللطيفة

التي قلتها لمن تحب وكل الكلمات التي سمعتها منه ...

وأجعل في ألبوم أيامك مجموعة من الصور الجميلة

لذلك الانسان الذي سكن قلبك يوماً ... ملامحه ... بريق

عينيه الحزينة ... ابتسامته في لحظة صفاء ...

ووحشته في لحظة ضيق ... والأمل الذي كبر بينكما يوماً

وترعرع حتى وإن كان قد ذبل ومات ...

وإذا سألوك يوماً عن انسان أحببته

فلا تحاول تشويه الصورة الحلوة لهذا الانسان الذي أرتبطت به

فاجعل من قلبك مخبأ لكل أسراره وحكاياه

فالحب الصادق ليس مشاعر وأحاسيس فقط

بل أخلاق وقيم عظيمة.



لحظات لا تنسي مش انا اللي كاتبها
دا اميل جالي
بس عجبني جدا خصوصا انه بيقول كلامه انا
عايزه اقوله


٠٩ يوليو ٢٠٠٧

امتحان ثانويه عامه




احمد: الامتحان يا عم كان كويس بس هو السؤال الرابع اللي كان صعب شويه
محمد: السؤال الرابع دا صح وغلط يابني صعب في ايه
احمد: صح وغلط لا ياراجل
!!!!!!!!!
انا حليته علي انه توصيل
نادر: صح وغلط ايه وتوصيل ايه
انتوا شكلكم بتستهبلوا وبتشتغلوني
مهيش نقصاكم والله
يا عم انت وهو السؤال كان عايزك تحط لكل جملة سؤال
قال صح وغلط
والله بتستهبلوا شكل الامتحانات لحست عقلكم
انا: امتحان ايه الللي بتتكلموا عنه
؟؟؟؟؟
امتحان الفرنساوي
تانيه ثانوي
انا: لا ربنا يعنكم بجد
تخيلوا طلبه ثانويه عامه بتمكلموا عن الامتحانات وبتوقعوا هما هيجيبوا كام في الميه
حلو ايه بقي في الامتحان



Au revoir

٠٣ يوليو ٢٠٠٧

حلم فكان



محمد التهامي

كاتب مسرحيه رائعه انا قرائتها

وبصراحه هي شئ يستحق القراءه


وكتبها اثناء معاناة الثانويه العامه

لازم ترحوا تقروها

انا مش هتكلم عن اي شئ فيها لانها مليانه احداث جميله جدا

٢٦ يونيو ٢٠٠٧

أحــلي طفل في العالم


وحشتيني جدا يا توتو بقالك اسبوع ياراجل

دي صور توتو او مصطفي او توفي او توته

ابن اختي

توتو دا احلي حاجه في حياتنا


هو اصلا احلي طفل في العالم

واتحدي ان يكون في طفل عسوله كده زي توتو وزكي ماشاء الله زيه



دا توتو في الصيف


توتو وهو بيلعب

شفتوا الجمال



توتو قبل ما ينام



الحاج مصطفي كان بيعمل عمره

تقبل الله




محترف يا توتو

عبقرينوا



دي بقي المفاجأه







علي فكره دا برده توتو بس بعد ما لبس الطرحه بقي بنوته


وبنوته عسوله كمان


مش احلي طفل في العالم برده

١٨ يونيو ٢٠٠٧

كـــــــن نـــفــســك




كن نفسك

دائما كنت اسمعها وارددها
كثيرا ما اقتنعت بها واقنعت بها
ولكني في وقت ما اكتششفت انني لا اعرفها لكي اكون هي
لا اعرفها
اعرف من انا
لكني لا اعرف لماذا افكر هكذا لماذا اقبل هذا وارفض ذاك
لا اجد تفسيرا لما بداخلي من تناقضات ولماذا اتخدت هذه القرارات
حائره بيني وبين نفسي
بين ما اريده وبين ما استطيع ان افعله
بين ما انا فيه وبين ما اتمناه
حائره بين امس واليوم وغدا
.
..

ولكن الان بدات اتفهمها
لانني احاول اولا ان ارضي عن ما انا فيه
وان اتطلع الي ما هو افضل
وان احدد كيف ساصل لما هو افضل وان ابدا في تحقيقه

اما امس واليوم وغدا
فاذا كان الامس قد ضاع فبين يدي اليوم

واذا كان اليوم سوف يرحل فبين يدي الغد
فلا داعي للحزن علي الامس فهو لن يعود
ولا داعي للاسف علي اليوم فهو راحل
.
فقط اتعلم منهم
وكن نفسك

٠٤ يونيو ٢٠٠٧

٠١ يونيو ٢٠٠٧

حكومة مــــــــاريــنـــــــا

حد قرأ المقال دا



لو تعثرت «حسناء» في مارينا لهلكت حكومة نظيف بالكامل

فاجأنا السيد وزير النقل باعتماد ميزانية مفتوحة لعلاج تشوهات طريق مارينا بطول ٨٠ كم!! فياله من قرار رائع سوف يقطع ألسنة الذين يتهمون الحكومة بقسوة القلب واللامبالاة،
فهذا هو وزير النقل يعلنها مدوية «لو تعثرت حسناء في مارينا لخشيت أن يسألني الله لم لم تمهد لها الطريق..»، وربما نزل الوزير بنفسه ليتفقد أحوال الرعية هناك، لم أندهش لهلع الوزير علي ضحايا طريق مارينا ولا لأمره بسرعة علاج تشوهات الطريق، فهذا واجبه وهؤلاء شركاؤنا في الوطن وليس ذنبهم أنهم يسكنون الأدوار العليا في هذا الوطن، والتي تطل علي البحر وتري النعيم أما نحن فسكان البدروم تزكم أنوفنا رائحة المجاري التي تحاصرنا في كل مكان،
اندهاشي أن يقتصر اهتمام وقلق وهلع الوزير علي ضحايا طريق مارينا علي حساب ضحايا الطرق الأخري، من قليوب إلي أبنوب، ومن المحور إلي الدائري، ومن الطريق الدولي إلي طريق الصعيد وهم بالآلاف، ألم يأن للسيد الوزير أن ينزل إلي شوارعنا فينظر إلي أحشائها، وقد خرجت ولم نعد نتذكر شكل الأسفلت، ولا حتي عفاريته الذين انقرضوا، بعد أن تحول الأسفلت نفسه إلي عفريت يحاصر المارة ببلاعاته وحفره ومطباته ويحصد أرواح الأبرياء،
إنها حقا مفارقة عجيبة بين أناس تُسَخَّر لهم كل مقدرات وإمكانات هذا الوطن من أجل حياة لا شقاء فيها، وهم بحق باشاوات هذا العصر وبين آخرين ربما كانت سعادتهم الوحيدة في الحصول علي فرصة لخدمة هؤلاء الباشاوات.

http://http://www.almasry-alyoum.com/article.aspx?ArticleID=62987

٠١ مايو ٢٠٠٧

تـــــــــــــاج

دا اول تاج يجي ليا
هو اسئلته بايخه

بس انا هجاوب عليه

علشان صديقتي العزيزة عالمي ازرق هي مررته ليا


section 1

last beverage?

شـــــــــاي


ِlast phone call

نسرين



last instant message ?

شحص ما

last cd played


مش فاكره

last time u cried ?

النهارده

last text message ?

بسمة صاحبتي

Section 2
- Have You Eversdated someone twice?

ما علينا خليه علي جنب


hv u evers been cheated on ?

من بره المنهج السؤال دا



lost some one special?

كتير كتيرر اوووي كانوا اصحابي


been depressd ?

جايز

Section 3


- List 3 Favorite Colors-

دا

ودا

ودا

ودا

ودا


Section 4 -


This month have you

Made a new friend?


مروة صديقتي العزيزه بحب اقولها كده

Fallen out of love?

ربنا يستر

Laughed until you cried?

بتحصل بس بيبقي بسبب حاجه جامده بس الشهر دا بما اننا في اوله لاء

Met someone who changed your life?

الشهر دا لاء بس ممكن تقول ان تاثيره بان الشهر دا

ممتد المفعول

Found out who your true friends were?

الشهر دا لا

Is there something you want to tell someone?

نفسي اقول لناس كتيره اتقوا ربنا





How many people on your top friends do you know in real life?

كتير

How many kids do you want to have?

بتمني يبقي عندي 12 بيبي

6 ولاد

6 بنات

بس اما فكرت لقيت ان دي حاجة مستحيله فكررت انهم يكونوا عشرة

وهم كالتالي

يوسف - محمد - عبد الرحمن -كريم -نادر

عشق - همسة -فجر- سهر - مريم

بيقولولي اخرك تتفرجي عليهم انتوا ايه رايكم

Do you have any pets ?

لا

Do you wanna change your name?

لا طبعا اغيره ازاي

بوسي في ارق من كده

What did you do for your last birthday?

كان عندي امتحان علشان كده زاكرت

اصل عيد ميلادي في الامتحانات دايما فتلاقيني بحتفل بيه

بالمناسبه هو 6/6

ابقوا قولولي كل سنه وانت طيبة

What time did you wake up today?

الساعة واحده بعد منتصف الليل

What were you doing at midnight last night?

ليه بس كده

دلوقتي من الساعة واحده لحد الفجر دا بعمل حاجات كتير اهمها النت

Last time you saw your father?

من ساعتين تقريبا

What is one thing you wish you could change about your life?

حياتنا كلها نفسي اغيرها بس مين يقدر

What are you listening to right now?

اغنية مقدرش انساك
******

باقي الاسئلة ملغية مش مقرره

اما امرره لمين مش همرره لان الاسئلة رخمة جدا

١٤ أبريل ٢٠٠٧

الحكم بعد المداولة

الحكم بعد المداولة



......
...

السعادة .. كلمة معناها النجاح.والنجاح .. رحلة ومحتاجة إلى كفاح.والكفاح .. إيمان بيتحدى الليالي.والليالي .. بعدها شمس الصباح والصباح .. مرسوم على جبينه الأمل والأمل ويا العمل نجاح وزيادة..
ساعتها نعرف يعني إيه معنى السعادة

اجمل احساس في الدنيا احساسك بالسعادة
اكيد تبقي في قمة السعاده لو كان عندك هدف معين وقدرت تحققه
اكيد تبقي في قمه السعادة اما تتعب وتلاقي نتيجة تعبك وتلاقي اللي قدر تعبك دا
اكيد تبقي في قمة السعادة لما تبقي فرحان وتحس ان الناس فرحنين ليك
لو كل الحاجات دي اتجمعت في وقت واحد يعني حققت الهدف اللي كنت بتتمناه وتعبت ولاقيت نتيجة تعبك وفرحت وشفت الفرحة في عنين اللي حواليك
مقدرشاوصف احساسها في اللحظة دي
اقولكم علي اللي حصل بالظبط

الحكم بعد المداولة بعد الكلمتين دول كان القلق علي كل الوشوش الكل قلقان المداولة مطولتش وبعدها كان الحكم دا
.
.
قررت اللجنة منح الباحثة نسرين عبده زكي الحديدي درجة الماجستير بتقدرير امتياز مع التوصيه بالطبع والتداول
مقدرش اوصفلكم قد إيه كانت الفرحة بس برضه كانت الدموع موجودة بس من الفرحة
ألف ألف مبروك يا دكتورة نسرين عقبال الدكتوراة وتكون جامد جدا زي الماجستير أنت تستاهلي كل خير ولو في تقديراعلي من كده انت تستاهليه

أول مره لجنة المناقشة بدل ما تناقش وتعترض وتجادل الباحثة في الرسالة يمدحوا في الرسالة وفي الشغل اللي بذلته
أول حاجة قولوها الرسالة دي دكتوراه مش ماجستير
نسرين دي أختي

٣١ مارس ٢٠٠٧

يا أمــراضــك يــا مـصـر

السل والحصبة الألمانية
مواقف لو العالم عرفها اكيد هيشيد بيها مواقف تحسب لهم ولا تحسب عليهم
وزارة الصحة النهاردة قالت ان في مصر - حوالي اربع محافظات _ فيها 2943 حالة مصابة بالحصبة الالمانية
بس قالت _والكلام د/نصر السيد وكيل الوزارة _ متقلقوش ياجماعة المرض مفيش اي خطورة ليه (الماني بقي ) اللي بيصاب بالمرض بياخد مناعة طول العمر منه
بجد حسيت انه في اخر المؤتمر هيقول : نداء الي كل الاباء والامهات سيبوا اولادكم يتعدوا دي حاجة مفيهاش ضرر
اما الموقف التاني اللي بجد يحسسك بعبقرية العمل الوزاري الناس دي بتتعب بجد
خبر بيقول (ظهور مرض الــســل ) في القاهرة الكبري وسبعة محافظات والجهات المختصة تواجه مشكله في اكتشافه
منظمة الصحة تقول ان الاصابة بالمرض دا ادت الي وافاة مليوني شخص السنه اللي فاتت
اما الوزارة فبتقول المشكلة اننا مش قادريين يكتشفوا المرض وكل اللي بيعملوه ان اي ح بيموت يقدروا ساعتها يقولوا انه كان مصاب بالمرض ودي عبقرية علشان يعملوا حسابهم برده
تمام بجد
النهارده حالات الاصابة بانفلونزا الطيور بقت 31 حالة
كده كله تمام سيبوا الاطفال تتعدي بالحصبة ايه المشكلة
سيبوا السل ياخد مجراه الطبيعي وزي ما منظمة الصحة بتقول ( ما ظهر السل الا وانتشر ) وكمان سيبوا انفلونزا الطيور الصيف قرب والمرض هيختفي
اعتقد ان وزارة الصحة بتحاول تحقق نجاح في مشروع تنظيم الاسرة بس كل وزاره وليها طريقتها

١٧ مارس ٢٠٠٧

!....... مــش عـــارف

(قالولي بتحب مصر ، فقلت مش عارف )
تميم البرغوثي رد بصراحـــــة وقال مـــش عارف ، لكن احنا
المصرين طبعا احفاد الفراعنة اكيد عارفين

أكــيد عارفيـــن ان معدل البطالة وصل الي (11.9) من قوة العمل

أكـــيد عارفـــين ان %45 من الشعب المصري عايشين تحت خط الفقر

أكـــيد عارفـــين ان المياه النظيفة اللي عندنا بتتسبب سنويا في
وفاة 90 الف مواطن مصري *
اصابة 100 الف حالة بالسرطان *
اصابة 35 ألف حالة بالفشل الكلوي *
اصابة 100ألف حالة بالكبد الوبائي *
..
ودا كله لان محطات التنقية المفترض فيها ان عمرها الافتراضي انتهي والكلور المستخدم في عمليات التنقية لا يستخدم في اي بلد في الدنيا الا في مصر (ام الدنيا) وكويس اوووي ان
احنا لسا عايشين.
.
أكـيد عارفـــين ان مجلس الشعب اذي يفترض فيه انه يضم ممثلين الشعب يحتوي علي
442
عضو من بينهم 418 عضو مشكوك في عضويتهم
..
أكــــيد عارفـــين ان المسئولين في مصر عجزوا عن حل مشكلة (القمامة) ولذلك تم التعاقد مع الشركة الاسبانيه لحل هذه المشكلة المستعصية في القاهرة والجيزه بمقابل160 مليون جنيه سنويا ، وليس ذلك فقط بل انه نظرا لتركم الديون والعجز في التمويل وصلت المديونيه الي ( 300) مليون جنيه لصالح الشركة الاسبانية ومازالت المشكلة قائمه سواء القمامه ام الديون
أكــيد عارفــين ان بنك الاسكندرية قبل ما يتباع تم اجراء اصلاحات واعاده هيكله وسداد ديون تكلفت كلا منها 11 ملـــيار جنيه وبعدها تمت عملية البيع مقابل 12 ملـــيار جنيه
بيع بنك اسكندريه يعد مشكلة كبيره عمليه البيع ادت الي انكماش بنوك القطاع العام الي بنكين مما يعني ارتفاع حصة البنوك الاجنبية في مصر الي %47 وبالتالي انخفاض حصة البنوك العامة المصرية
..
أكــيد عارفـــين ان الناتج القومي للعالم العربي كله (مش مصر لوحدها) بيعادل الناتج
القومي لدولة اسبانيا ( علشان كده جبناهم يحلوا لينا مشكلة القمامة) ولا ايه
..
أكيــــد عارفــين أن كلية الشرطة بيتخرج منها سنويا1000 ضابط في حين انه يتم تحويل (500 )ضابط سنويا الي مجالس تأديب بسبب ارتكاب جرائم السرقه بالاكره وتعاطي المخدرات وغيرها من الجرائم الي تشرف
...
أكـــيد عارفـــين ان مصر رائده المشاريع ( اللي ملهاش لازمه ) حتي في مشروع جديد خلص بس مشروع عقبري عبارة عن فندق 7 نجوم مقام علي سبعة افدنة في منطقة المنصورية كده تمام الفندق دا بقي عملوه علشان يواجه مشكلة خطيره وهي ان الناس اللي عندهم كلاب اما بيجوا يسافروا مش بيعرفوا يودوا الكلاب بتاعتهم فين علشان كده عملوا الفندق دا للكلاب
بمناسبة الكلاب
..
أكــيد عارفيـــن ان المنحة الدولية والتي تقدر ب (180) ملــــيون دولار والمخصصة لاسكان الفقراء في منشية ناصر تم استغلالها احفضل استغلال وذلك لبناء مستشفي لكلاب وزارة الداخلية
أكـــيد عارفـــين ان معدل التلوث في القاهرة اعلي عشر مرات من المؤشر العالمي الذي حددته منظمة الصحة العالمية
............
أكيد كل ده عارفينه واكتر من ده كمان
عارفين ولا مش عارفين كله عادي
مفيش حاجة هتتغير
الاكيد بقي اننا بنحب مصر
هنكرهها ليه
العيب مش فيها العيب فينا وفيهم

١٥ مارس ٢٠٠٧

حياتنا

ساعات بنتعود من الدنياعلي كل حاجه وحشه
وبنتعود من الناس علي كل حاجه غلط
حتي الغلط بقي في حياتنا اسمه صح
وبنخلق مبررات كتير للغلط
مش معني كده ان الحياه وحشه
اكيد
اكيد فيها حاجات جميله
بس احنا مش بنبص ليها
او جايز لسه مش قبلناها
بس الاكيد ان وسط الضلمه
في نور
ووسط النفوس السيئه
في نفوس طيبه
ووسط الشر
موجود الخير
لو لسه مش لاقي حاجه حلوه في الدنيا
حاول تكون انت الحاجة الكويسه اللي في الدنيا
واللي ممكن الناس تبص ليها وتبقي فرحانه

٠٣ مارس ٢٠٠٧


!!!!..... كـــــــــــــلام عجــــــــــبني








الكلام اللي هكتبه المره دي مش كلامي بس كلام عجبني من اكتر الحاجات اللي عجبتني في الكلام ده انه عن تجربة حقيقيه وان كل كلمة فيه بتوصف حاجة حصلت بجد بتوصف الاحساس
الكلام دا جايز يكون بالنسبة ليك عادي بس بالنسبة ليا مش عادي لانه بجد جميل جدا واللي اجمل منه الشخص اللي كتبه





رسالة ودموع



علمتني كيف اعشق ، وكيف احب
علمتني كيف اشعر بالاخر
علمتني كيف اخاف من كل شئ حتي عليها
احببتها ولم اكن احب غيرها لاني لم اعرف الحب قط
كانت بالنسبة لي الحب والعشق والحياة
وعدتها باني لن اتركها
بكت
فتقطعت اوصالي فاحببتها اكثر
لاني لم اكن اعرف ان مجرد كلمات لم اكن اقصدها

جرحتها
جدتها حساسة
ناعمة

فاقسمت اني لن اجعلها تحزن


لان عبراتها غالية واني لا استحقها
احببتها لانها تشبهني في كثيرمن الامور

دعوت ربي كثيرا لكي يجعلها لي


الذي لا اعرفه


لماذا تركتني؟؟؟؟؟؟؟؟
كنت ساضحي بكل شئ من اجلها

فهيا العزيز والغالي




تركتني
تركتني في اشد ما يكون المرء في احتياج لها


فلماذا قالت لي انها ستقف بجانبي


لماذا تركتني؟؟؟؟؟؟؟؟؟؟



جعلتني احلم وكانني كنت في حلم وردي جميل


لكن صحوت علي كابوس مؤلم
علمني حبي لها كيف ابكي
ولم اكن ابكي حتي لفراق اعز ما املك


تركتني


بعدما شعرت ان للحياة لون ورونق

احببت الحاة من اجلها



بل سميتها الحياة
اشهدالله واشهدها
اني لم احب غيرها
لاني لم اكن اعرف الحب الا معها

فهل من الممكن ان اجد من يشبهها
ولن اكرهها

طالما عشت وطالما بقي من العمر بقيه


سوف اتذكرها دائما............رسالتي هذه


كتبتها بدموعي
والتي لم اكن اعزها علي اغلي واحلي واطيب وائدب فتاة
عشقـــــــــــــــــتها
كانت كل شئ جميل
ورحلت بكل شئ جميل
تركتني
بعالمي هذا كلوحة فنان بيضاء تنقصها
الوانه لتحدد معالمها

هذا حالي بعدها


وانا ساظل ادعو لها بحياة افضل
وسعاده تدوم
ومستقبل مشرق
لن اضع خاتمه لتلك الرسالة

لانني اكره كلمات الوداع

وما يدل عليها
!!!!!!!!!!!!! فلن تغيب عني لحظة

!!!!!!!!!!!!!....... تيجي نعيشها صح

في يوم كنت بفكر في حياتي وحياة الناس وعشيتنا كلها لاقيت ان احنا بجد بنصعبها علي نفسنا اووووي في الاخر بنكتشف ان احنا مش عايشين يعني علي سبيل المثال تلاقي ان
الناس تلات انواع او اجزاء

الجزء الاول حصلتلوه مصيبة في حياته او مر بتجربة كانت قاسية شوية الجزء ده بيكمل حياته بعد التجربة دي في الم وحزن وبيفضل عايشها وكانها لسه حصلاله لا بيستمتع بالحياه ولا بيحسها

اما الجزء التاني فبيبقي عايش عادي بس متوقع ان في حاجة وحشه هتحصله او نهاية فظيعة لحاجة هوا عايشها لدرجه ان خوفه من الي هيحصل بيضيع احساسه بالفرحه ومش بيحس بالحياه ولا بيحسها برده

اما الجزء التالت فهما اللي بيقروا الكلام بتاعي دلوقتي وبيقولوا احنا لازم نبقي واقعين ونحسب كل حاجة ونتوقع المصائب والكوارث اللي في حايتنا وفي منهم هيقول ايه اللي في حياتنا يخلينا نعيش الحياة ونبقي فرحانيني ونحسها وكمان نحبها

اقولكم حاجة اعتبروها نصيحة ايه هيحصل لو نكبر كلنا بنشوف اللي بييحصل حوالينا واللي بيحصل لينا وبعدين ايه هيفيد لو فضلنا كده كبروا هتكسبوا راحة البال عيش الحياة بجد لو في حاجه هتضايقك مش تبص ليها اعمل نفسك مش واخد بالك والدنيا مش بتقف عند موقف معين

عجبي

في يوم من الايام حصليتلي حاجة غريبة جدا اليوم كله كان غريب يعني اول ما صحيت من النوم لاقيت ماما واخواتي بيقولولي صباح الخير مش عوايدهم يعني قلت جايز دا عادي بعدين نزلت من البيت خير اللهم اجعله خير لقيت الشوارع جميلة جداا ونظيفة اووي حسيت ان الشوارع كانها اتولدت من جديد وانا اول اول حد مشي فيها والناس كمان بتبتسم في وشك لوجه الله سبحان الله ( بتحصل) لا وكمان بتعملوا مع بعض باسلوب راقي الاغرب من ده ان مفيش زحمه لا وكمن تلاقي ان الناس بقي عندهم زوق اللبس بتاعهم معقول ومقبول وكمان المحلات الوانها جميله واسمائها مش غريبة وسبحان الناس بتسمع فيروز وحليم وام كلثوم (انا قلت اكيد انا سفرت للقرن اللي فات ) تكرب الموصلات تلاقي الركاب ماشاء الله متحضرين وبتكلموا بصوت منخفض وبتكلموا في مواضيع جاده تحس من كلامهم انهم فاهمين الواقع ومشاركين فيه في الوقت ده استوعبت ان التغير اللي في الشوارع والمحلات نتيجة طبيعية لتغير الناس
كوضع طبيعي مني اني اتاقلم مع الوضع الحالي وابقي زيهم واتكلم بلغتهم وباسلوبهم ولكن قبل ما اتغير
نسيت اقولكم اني كنت بحلم
وصحيت من النوم واكتشفت ان الوضع المثالي ده لا يمكن نلاقيه غير في الاحلام وافتكرت وقتها صلاح جاهين اما قال
في يوم صحيت شاعر براحة وصفا
الهم زال والحزن راح واختفي
خدني العجب وسالت روحي
انا مت ؟ ولا وصلت للفلسفة
وعجبي!!!!!